Mánudaginn 19. október verður raddæfing hjá messó.  Fyrir miðvikudag eiga allar að vera búnar að læra lagið "Haustvísur til Máríu", og þær sem ekki eru búnar að læra "Pater Noster" og "Heil sért þú María" halda áfram með þau. 

Næstkomandi mánudagskvöld, 14. september, heldur Kvennakór Suðurnesja kynningar- og skemmtikvöld í Listasmiðjunni á Ásbrú kl. 20. Allar konur eru velkomnar en kórinn vantar fleiri hressar og skemmtilegar konur í sínar raðir og býður því sérstaklega velkomnar konur sem hafa gaman af söng.

Kvennakór Suðurnesja var stofnaður 1968 og er hann elsti starfandi kvennakór landsins.  Kórinn er skipaður konum alls staðar að af Suðurnesjum og vonast kórfélagar til að sjá konur úr öllum bæjarfélögunum á Suðurnesjum á mánudagskvöldið.  Starfið hefur verið sérstaklega gróskumikið undanfarin ár, en meðal annars tók kórinn þátt í kórakeppni sem fram fór á Riva del Garda á Ítalíu í október 2007 og vann þar til verðlauna í gullflokki.  Í febrúar 2008 hélt kórinn síðan upp á 40 ára afmæli sitt með stórtónleikum í Íþróttaakademíunni ásamt Léttsveit Tónlistarskóla Reykjanesbæjar og einsöngvurum, auk þess sem fjöldi kvenna sem hafa sungið með kórnum í gegnum tíðina tóku þátt í tónleikunum.  Árið 2004 fór kórinn í söngferðalag til Ungverjalands og árið 2000 var kórnum boðið sem gestakór í kórakeppni sem fram fór í Cork á Írlandi.  Auk þessa tekur kórinn þátt í Landsmótum kvennakóra sem haldin eru á þriggja ára fresti á mismunandi stöðum á landinu, en Kvennakór Suðurnesja hélt landsmót í Reykjanesbæ árið 2003.  Kórinn var einn af stofnendum Gígjunnar, landssambands kvennakóra á Íslandi og kom fyrsti formaður sambandsins, Guðrún Karitas Karlsdóttir, einmitt frá Kvennakór Suðurnesja.

Kvennakórinn heldur a.m.k. tvenna til þrenna tónleika á ári, auk þess að taka þátt í ýmsum uppákomum svo sem Ljósanótt og Þrettándagleði í Reykjanesbæ.  Kórinn tók einmitt virkan þátt í nýliðinni Ljósanótt þar sem hann söng m.a. á tónleikum í Svarta Pakkhúsinu á fimmtudagskvöld, á útisviðinu á föstudags- og laugardagskvöld og á hátíðartónleikum í Fjölbrautaskólanum á sunnudeginum ásamt öðrum kórum og listamönnum.  Auk þess kom kórinn fram í Duushúsum og Íþróttaakademíunni.

Kvennakór er ekki bara vettvangur söngs, heldur er þetta líka skemmtilegur félagsskapur kvenna og gera kórfélagar ýmislegt skemmtilegt saman.  Auk þess að fara í árlegar æfingabúðir þar sem vinna og skemmtun fara vel saman, koma konurnar t.d. alltaf saman ásamt fjölskyldum fyrir jólin og gera laufabrauð, sem síðan er selt til fjáröflunar fyrir kórinn.  Einnig er haldið lokahóf á vorin og ýmislegt fleira eftir því sem tilefni eru til, en kórinn fer alla jafna í frí yfir sumartímann og á stórhátíðum.

Við hvetjum allar konur til að kíkja á Kvennakórinn á mánudagskvöldið og kynna sér starfsemi hans.

Það verður þéttskipuð dagskrá hjá kórnum fram að og á Ljósanótt, en hún lítur nokkurn veginn svona út:

Sunnudagur 30. ágúst kl. 20-22, kóræfing í aðstöðunni okkar.  Æfum lögin okkar úr tónleikaprógrammi frá í vor.

Mánudagur 31. ágúst kl 19-?, æfing með Guðmundi Rúnari uppi á lofti í Svarta pakkhúsinu.

Þriðjudagur 1. september kl. 19-?, sameiginleg æfing í Fjölbrautaskólasalnum fyrir tónleika á sunnudeginum, lögin með öllum kórunum.

Miðvikudagur 2. september kl. 20-?, æfing með Karlakórnum og hljómsveit í KK sal Vesturbraut, Suðurnesjalög.

Fimmtudagur 3. september.  Kl. 18, hljóðprufa í Svarta Pakkhúsinu.  Kl. 19, æfing í Fjölbrautaskólanum.  Kl. 21, tónleikar með Guðmundi Rúnari uppi á lofti í Svarta pakkhúsinu.  Mæting fyrir kl. 21.   Klæðnaður (hvít) skyrta, efri partur af búningnum okkar og gallabuxur (eða aðrar buxur) .  Þemað verður gult og rautt þannig að allir sem koma fram á tónleikunum eiga að vera í einhverju gulu eða rauðu, eða með eitthvað í þessum litum á sér.  Það má því vera í gulri eða rauðri skyrtu eða bol við svarta toppinn, eða vera með klút, trefil eða eitthvað þess háttar í þessum litum.

Föstudagur 4. september kl. 16, syngjum með Karlakórnum við opnun sýningarinnar Reykjanes 2009 í Íþróttaakademíunni, Suðurnesjalögin.  Mæting kl. 15.30.  Klæðnaður snyrtilegur.  Hljóðprufa á útisviði kl. 18.  Syngja með Guðmundi Rúnari á Stóra sviðinu kl. 20.30.  Mæting 10-15 mín. áður.  Klæðnaður þar er "eftir veðri" þ.e. vera vel klæddar því það er kalt á útisviðinu.

Laugardagur 5. september kl. 12, mæting í Tónlistarskólann á Þórustíg, upphitun fyrir tónleikana okkar.  Syngjum í Íþróttaakademíunni á sýningunni Reykjanes 2009 kl. 13.  Tónleikar í Bíósal Duushúsa kl. 14.  Klæðnaður eins og hver vill, snyrtilegar og sumarlegar .....helst í pilsi til að sveifla og trefill með fyrir sveifluna í "Sveiinu"!  Stóra sviðið um kvöldið tónleikar með KKK og hljómsveit, mæting í KK-salinn kl. 20.45, mæting við útisvið kl. 21.30.  Hljóðprufa líklega kl. 18.  Klæðnaður lopapeysur og gallabuxur.

Sunnudagur 6. september.  Tónleikar með fleiri kórum og einsöngvurum á Suðurnesjum í sal Fjölbrautaskólans kl. 16. Mæting ?__________________.  Það verður rennsli/generalprufa á sunnudeginum, líklega kl. 13.  Klæðnaður kórbúningurinn okkar.

Kæru söngsystur, framundan er mikið "húllum hæ".  Verum samtaka og skemmtum okkur í þessum ólíku verkefnum.  Mætum stundvíslega og munum eftir að láta raddformenn vita ef við getum ekki mætt á réttum tíma.  Í öllum verkefnunum nema í Bíósalnum megum við hafa nótur á tónleikunum, höfum þær í svartri möppu.  Æfum okkur heima.  Höfum með okkur eitthvað að drekka á æfingarnar.  Förum vel með okkur og njótum söngveislunnar sem við erum þátttakendur í .

Það var vaskur hópur fólks sem mætti í æfingaaðstöðu kvennakórsins í Listasmiðjunni í gær.  Þeir fyrstu voru mættir um níuleytið og var strax hafist handa við að tæma salinn svo að hægt væri að rífa teppaflísar af gólfinu.  Þegar þær voru farnar af kom í ljós að undir þeim voru dúkaflísar sem voru einnig látnar fjúka.  Einnig var gömlum skáp og veggplötum hent út.  Á meðan karlarnir og nokkrar konur unnu við þetta tóku hinar konurnar til við að flokka nótnasafn kórsins, en það er orðið töluvert stórt og mikil vinna að fara í gegnum það.  Þar sem veðrið var frábært var ákveðið að hætta uppúr hádegi og hittast aftur á mánudagskvöld 25. maí kl. 19.  Þá verður haldið áfram að flokka nóturnar auk þess sem æfingasalur verður málaður.  Nú mæta allir sem vettlingi geta valdið!