Það verður nóg um að vera hjá Kvennakór Suðurnesja á næstunni, en kórinn mun syngja á fimm tónleikum í maí.  Kórinn heldur vortónleika í Listasmiðjunni á Ásbrú mánudaginn 3. maí, þar sem verður kaffihúsastemmning, og í Bíósal Duushúsa miðvikudaginn 5. maí.  Tónleikarnir hefjast kl. 20 bæði kvöldin.  Kórinn mun frumflytja nokkur létt og skemmtileg lög eftir Eirík Árna Sigtryggsson við ljóð Þórarins Eldjárns en auk þess verða flutt lög úr óperum, dægurlög og kirkjuleg verk.  Helgina 7. - 9. maí fer kórinn til Akureyrar þar sem hann mun halda tónleika ásamt Kvennakór Akureyrar í Laugaborg í Eyjafirði laugardaginn 8. maí kl. 17.  Laugardaginn 15. maí syngur kvennakórinn síðan á tónleikum í Bíósalnum ásamt Átthagakór Strandamanna og miðvikudaginn 19. maí tekur kórinn þátt í minningartónleikum sem haldnir verða um Siguróla Geirsson.  Stjórnandi Kvennakórs Suðurnesja er Dagný Þórunn Jónsdóttir og meðleikari á píanó er Geirþrúður Fanney Bogadóttir.  Miðaverði er stillt í hóf en það er aðeins kr. 1000. 

Jæja, þá nálgast vortónleikar óðfluga og Akureyrarferð líka. Vortónleikar eru mánudaginn 3. maí í sal Listasmiðjunnar á Ásbrú kl. 20.00. Eftir æfingu á laugardag sem byrjar 9.45 förum við í að gera salinn tilbúinn fyrir tónleika, eru konur beðnar um að koma með skúringafötur og græjur. Búið er að taka alla kassa úr salnum. Einnig ef einhverjar konur eru tilbúnar að baka muffins eða smákökur er það vel þegið, til að hafa með kaffinu á tónleikunum. Endilega látið mig vita hverjar vilja baka.  Miðvikudaginn 5. maí verðum við í Bíósal einnig kl. 20.00 og þurfum við ekkert að gera nema mæta og syngja.

Auglýsingar voru settar í bæði bæjarblöðin og gott væri ef konur sem eru á facebook myndu auglýsa tónleikana þar, einnig í gegnum póstinn sinn. Og enn betra er að selja miða á tónleikana í gegnum styrktaraðila.

Akureyri:

Við leggjum að stað til Akureyrar kl. 13.00 frá Stapa föstudaginn 7. maí.  Gist verður á Hótel Akureyri sem er mjög huggulegt hótel í fallegu, gömlu húsi rétt við miðbæinn.

Laugardaginn 8. maí förum við í skoðunarferð kl. 10.00, verðum komnar á hótel kl. 13.30-14.00 og gerum okkur klárar, lagt verður af stað inní Laugarborg kl. 15.15, tónleikar verða kl. 17.00.  Konur eru beðnar um að taka djammfötin með sér, en vera í búningum þegar farið er frá hóteli.  Matur og skemmtun um kvöldið í Laugarborg og haldið í bæinn (Akureyri) um miðnætti, þá geta þeir sem vilja halda áfram að skemmta sér farið út á lífið og hinir taka á sig náðir.  Farið verður heim seinni part á sunnudegi.

Verð á rútu til Akureyrar er kr. 8.300 pr. mann.

Verð í rútu innan Eyjafjarðar er kr. 1.000  fyrir flug og bílafólk.

Matur á laugardagskvöld er kr. 2.700 pr. mann.

Hildur H. form.

Á morgun, laugardaginn 20. mars, leggur Kvennakór Suðurnesja leið sína í Kópavoginn, en Kvennakór Kópavogs býður til skemmtunar þar sem fjórir kórar ætla að hittast og borða og syngja saman auk þess sem kórarnir bjóða upp á heimatilbúin skemmtiatriði.  Auk Kvennakórs Suðurnesja og Kvennakórs Kópavogs mæta einnig Kvennakórinn Ymur frá Akranesi og Karlakór Kópavogs.  Hver kór verður með sitt litaþema og hefur Kvennakór Suðurnesja valið sér bleikan lit, auk þess eiga allir að nota álpappír til að skreyta sig með.  Skemmtunin hefst kl. 19 og verður hún haldin á efri hæð íþróttahússins Smárans í Kópavogi.
Þær konur sem ætla að fara eiga að mæta í upphitun / æfingu í Listasmiðjunni áður en við leggjum af stað eða kl. 17.30.

Allar raddir eiga að mæta á æfingu í kvöld, mánudag 15. mars.  Æfum fyrir Kópavogsferð.