Það styttist í árlega Skálholtsferð Kvennakórs Suðurnesja en hún verður farin um næstu helgi, 7.- 8. febrúar.  Mæting er á laugardag kl. 9.45 við SBK í Grófinni og lagt verður af stað kl. 10 stundvíslega.  Kostnaður er kr. 10.000 sem greiðist í rútunni á leiðinni austur, þannig að það er betra að muna eftir að fara í hraðbankann fyrir helgina.  Innifalið í gjaldinu er gisting í Skálholti, hádegisverður, miðdegiskaffi og kvöldverður á laugardegi og morgunverður, hádegismatur og miðdegiskaffi á sunnudegi auk æfingaaðstöðu.  Kórinn greiðir rútukostnað.  Konur þurfa að taka með sér rúmföt (sængurver, koddaver og lak), nótur, hlý föt og góða skó ef þið viljið fara í göngutúra, betri föt, drykki og snarl fyrir kvöldvöku (athugið að vín með kvöldverði er selt á staðnum) og að sjálfsögðu góða skapið eins og alltaf.  Dagskráin verður með hefðbundnu sniði, við mætum í Skálholt um hádegisbil og fáum léttan hádegisverð þegar við höfum komið okkur fyrir í herbergjunum.  Síðan hefjast æfingar og verður sungið fram undir kvöldmat með salernis- og kaffihléum.  Þá fá konur smástund til að snurfusa sig og skipta um föt fyrir kvöldverðinn.  Að honum loknum hefst síðan kvöldvakan.  Á kvöldvökunni eru heimatilbúin skemmtiatriði og er hér með auglýst eftir einhverjum slíkum.  Þannig að nú er um að gera að leggja höfuðið í bleyti og finna upp á einhverju skemmtilegu.  Skynsamlegt er að halda veigunum í hófi og  fara ekki mjög seint í háttinn á laugardagskvöldinu þótt fjörið sé mikið, því það er byrjað að syngja aftur af krafti eftir morgunmat á sunnudagsmorgni og sungið, með matar-, kaffi- og salernishléum, þar til lagt er af stað heim, væntanlega um sexleytið.  Þetta hafa alltaf verið frábærar ferðir, bæði skemmtilegar og gagnlegar, því það er farið yfir mikið efni á æfingunum og því ekki gott að missa af þessu.  Svo hefur maturinn alltaf verið mjög góður (vonandi er Bjarni kokkur ennþá á svæðinu) og félagsskapurinn er náttúrulega ekki af verri endanum eins og við vitum allar.  Það er nú gott að komast aðeins burt frá amstri dagsins og fá smá hvíld frá matarstússi og öllu hinu.  Þátttakan virðist ætla að vera góð núna og eru flestar kórkonur sem eru starfandi núna búnar að skrá sig. 

Hér er lagalisti Kvennakórs Suðurnesja fyrir vortónleika 2009.  Það er alþjóðlegt yfirbragð á lagavalinu að þessu sinni, auk nokkurra íslenskra laga eru á listanum lög frá Filippseyjum, Rússlandi, Serbíu, Japan, Kenýa, Suður-Ameríku, Jamaíka og Svíþjóð.  Þær sem eiga nótur að þeim lögum sem við höfum sungið áður (Jónasarlögin, Ahay Tuburan og Niska Banja), endilega reynið að finna þær hjá ykkur og koma með á næstu æfingu.

Lagalisti vorönn 2009

Jónasarlög:
    Heylóarvísa
    Úr Hulduljóðum
    Vorvísa (Tinda fjalla)
Ahay Tuburan
Kalinka
Niska Banja
Hotaru Koi
Kenya Melodies
Sway
El ritmo de la noche
People get ready
Mamma mia syrpa
Hvítir mávar

Það verður gaman að takast á við þetta, og munið bara að byrja strax að læra textana, það er ekki hægt að læra þetta allt á síðustu stundu.

Kvennakórinn hefur flutt starfsemi sína í Listasmiðjuna á Vallarheiði og var fyrsta æfingin þar á mánudaginn.  Kórkonur byrjuðu á því að þrífa aðstöðuna áður en þær hófu upp raust sína.  Eflaust verður farið í einhverjar endurbætur á húsnæðinu með tíð og tíma, en mest um vert er að kórinn er nú kominn með aðstöðu þar sem hægt er að hafa allt á einum stað, en hingað til hafa eigur kórsins eins og nótnasafn og fleira verið geymdar á hinum ýmsu stöðum, oft heima hjá stjórnarkonum en síðast í geymslu sem Byggðasafnið hefur til umráða.  Með húsnæðinu fylgdi píanó sem greinilega hefur verið mikið notað, og þurfti aðeins að "tjasla því saman" eins og sést á meðfylgjandi mynd.  Fleiri myndir í myndaalbúmi.

Þá er þrettándandum lokið og var okkar kona, Birta Rós Arnórsdóttir glæsileg sem álfadrottning eins og von var á.  Tókust hátíðarhöld vel og flugeldasýningin glæsileg að venju.  Þó fannst okkur í álfakórnum að þeir sem að skipulagninunni stóðu hefðu mátt gefa okkur meiri upplýsingar um til hvers væri ætlast af okkur, eins og oft áður þegar breytingar hafa verið gerðar á skipulagi hátíðarhaldanna.

En nú eru æfingar að hefjast að nýju eftir jólafrí og nú á nýjum stað, en við ætlum að flytja okkur í Listasmiðjuna á Vallarheiði þar sem Reykjanesbær hefur útvegað okkur aðstöðu.  Fyrsta æfingin þar verður næstkomandi mánudag, 12. janúar kl. 19.30.  Listasmiðjan er til húsa að Keilisbraut 773 á Vallarheiði.

Gleðilegt ár!



Þá er komið að fyrsta verkefni nýs árs, hinni árlegu þrettándabrennu og álfasöngnum okkar.  Æfing fyrir þrettándann verður mánudaginn 5. janúar kl. 20:00 í Tónlistarskólanum á Austurgötu.  Hittumst allar hressar eftir jólafrí og muna eftir textunum.