Mánudaginn 5. október verður raddæfing hjá alt.  Fyrir æfinguna á miðvikudaginn eiga allar að vera búnar að læra lagið "Heil sért þú María" utan að.  Þær sem eiga nóturnar að "Pie Jesu" og "Yfir fannhvíta jörð" vinsamlegast takið þær með ykkur.

Það verður raddæfing hjá messó mánudaginn 28. september kl. 20.

Nýjar myndir í myndaalbúmi.

Það var gaman að sjá margar nýjar konur á æfingu síðastliðið miðvikudagskvöld og vonum við að öllum hafi litist vel á og haldi áfram að syngja með okkur.  Við eigum jafnvel von á fleirum sem hafa boðað komu sína en komust ekki síðast.  Kynningarkvöldið tókst vel, mætingin hefði kannski alveg mátt vera aðeins meiri, en þær sem mættu skemmtu sér vel og gæddu sér á kræsingunum sem kvennakórskonur buðu upp á.  Við þökkum þeim sem kíktu á okkur og kvennakórskonum er þakkað fyrir frábært kvöld og glæsilegar veitingar.
Í kvöld, mánudag 21. september verður raddæfing hjá sópran þannig að það er frí hjá messó og alt.  Á miðvikudagskvöld eiga allar að mæta.  Minnt er á að æfingar hefjast núna kl. 20 en ekki kl. 19.30 eins og verið hefur undanfarin ár, og eru konur beðnar að mæta tímanlega svo æfingarnar nýtist sem best. 
Athugið að undir liðnum "Á döfinni" hér að ofan má sjá hvað er framundan hjá kórnum.

Næstkomandi mánudagskvöld, 14. september, heldur Kvennakór Suðurnesja kynningar- og skemmtikvöld í Listasmiðjunni á Ásbrú kl. 20. Allar konur eru velkomnar en kórinn vantar fleiri hressar og skemmtilegar konur í sínar raðir og býður því sérstaklega velkomnar konur sem hafa gaman af söng.

Kvennakór Suðurnesja var stofnaður 1968 og er hann elsti starfandi kvennakór landsins.  Kórinn er skipaður konum alls staðar að af Suðurnesjum og vonast kórfélagar til að sjá konur úr öllum bæjarfélögunum á Suðurnesjum á mánudagskvöldið.  Starfið hefur verið sérstaklega gróskumikið undanfarin ár, en meðal annars tók kórinn þátt í kórakeppni sem fram fór á Riva del Garda á Ítalíu í október 2007 og vann þar til verðlauna í gullflokki.  Í febrúar 2008 hélt kórinn síðan upp á 40 ára afmæli sitt með stórtónleikum í Íþróttaakademíunni ásamt Léttsveit Tónlistarskóla Reykjanesbæjar og einsöngvurum, auk þess sem fjöldi kvenna sem hafa sungið með kórnum í gegnum tíðina tóku þátt í tónleikunum.  Árið 2004 fór kórinn í söngferðalag til Ungverjalands og árið 2000 var kórnum boðið sem gestakór í kórakeppni sem fram fór í Cork á Írlandi.  Auk þessa tekur kórinn þátt í Landsmótum kvennakóra sem haldin eru á þriggja ára fresti á mismunandi stöðum á landinu, en Kvennakór Suðurnesja hélt landsmót í Reykjanesbæ árið 2003.  Kórinn var einn af stofnendum Gígjunnar, landssambands kvennakóra á Íslandi og kom fyrsti formaður sambandsins, Guðrún Karitas Karlsdóttir, einmitt frá Kvennakór Suðurnesja.

Kvennakórinn heldur a.m.k. tvenna til þrenna tónleika á ári, auk þess að taka þátt í ýmsum uppákomum svo sem Ljósanótt og Þrettándagleði í Reykjanesbæ.  Kórinn tók einmitt virkan þátt í nýliðinni Ljósanótt þar sem hann söng m.a. á tónleikum í Svarta Pakkhúsinu á fimmtudagskvöld, á útisviðinu á föstudags- og laugardagskvöld og á hátíðartónleikum í Fjölbrautaskólanum á sunnudeginum ásamt öðrum kórum og listamönnum.  Auk þess kom kórinn fram í Duushúsum og Íþróttaakademíunni.

Kvennakór er ekki bara vettvangur söngs, heldur er þetta líka skemmtilegur félagsskapur kvenna og gera kórfélagar ýmislegt skemmtilegt saman.  Auk þess að fara í árlegar æfingabúðir þar sem vinna og skemmtun fara vel saman, koma konurnar t.d. alltaf saman ásamt fjölskyldum fyrir jólin og gera laufabrauð, sem síðan er selt til fjáröflunar fyrir kórinn.  Einnig er haldið lokahóf á vorin og ýmislegt fleira eftir því sem tilefni eru til, en kórinn fer alla jafna í frí yfir sumartímann og á stórhátíðum.

Við hvetjum allar konur til að kíkja á Kvennakórinn á mánudagskvöldið og kynna sér starfsemi hans.

Þá er Ljósanótt lokið og óhætt að segja að Kvennakórskonur hafi staðið sig frábærlega í þeirri fjölbreyttu dagskrá sem kórinn tók þátt í, en hún hófst á fimmtudagskvöld með tónleikunum "Pakkið í Pakkhúsinu", en þá söng kórinn með Guðmundi Rúnari Lúðvíkssyni og hljómsveit, lög eftir hann fyrir fullu húsi á efri hæð Svarta Pakkhússins.  Á föstudeginum sungu Kvennakór Suðurnesja og Karlakór Keflavíkur lög úr Ljósanætursvítunni við opnun sýningarinnar Reykjanes 2009.  Um kvöldið kom Pakkið í Pakkhúsinu síðan fram á útisviðinu við Ægisgötu og flutti nokkur lög.  Á laugardeginum byrjaði Kvennakórinn í Íþróttaakademíunni á sýningunni Reykjanes 2009 þar sem hann flutti nokkur lög, næst var haldið í Bíósal Duushúsa þar sem einnig var sungið, og um kvöldið tók kórinn síðan þátt í Ljósanætursvítunni á útisviðinu ásamt Karlakór Keflavíkur, ýmsum söngvurum og hljómsveit frammi fyrir 40-50 þúsund manns að talið var.  Á sunnudaginn lauk síðan Ljósanótt með glæsilegum hátíðartónleikum í Fjölbrautaskóla Suðurnesja þar sem fram komu Kvennakór Suðurnesja, Karlakór Keflavíkur, kór Keflavíkurkirkju, sönghópurinn Orfeus, fjöldi einsöngvara og hljómsveit.  Troðfullt var á tónleikunum og voru áhorfendur greinilega ánægðir með þessa tónlistarveislu, en á dagskrá var m.a. söngleikjasyrpa og atriði úr óperunni La Boheme.
Alls kom því Kvennakór Suðurnesja sjö sinnum fram á þessari Ljósanæturhátíð og gekk þetta allt saman mjög vel.  Kórkonur eru því eflaust þreyttar eftir langa sönghelgi og því verða engar æfingar þessa vikuna svo að raddböndin nái að jafna sig.  Kórinn hittist aftur á kynningarkvöldi kórsins mánudaginn 14. september og svo hefjast æfingar fyrir vetrarprógramm miðvikudaginn 16. september.  Nánar um kynningarkvöldið fljótlega.

Um næstu helgi, 3. - 6. september, verður Ljósanótt haldin í tíunda sinn í Reykjanesbæ og verður hátíðin enn glæsilegri en áður af því tilefni.  Kvennakór Suðurnesja tekur virkan þátt í hátíðinni og kemur fram við ýmis tækifæri alla dagana sem hátíðin stendur yfir. 
Á fimmtudagskvöld kl. 21 verða haldnir tónleikarnir "Pakkið í Pakkhúsinu" á efri hæð Svarta Pakkhússins þar sem Guðmundur Rúnar Lúðvíksson mun flytja 13 frumsamin lög ásamt Kvennakór Suðurnesja og hljómsveit, og á föstudagskvöld verða nokkur þessara laga flutt á útisviðinu við Ægisgötu.  Á föstudeginum mun Kvennakórinn ásamt Karlakór Keflavíkur syngja við opnun sýningarinnar Reykjanes 2009 í Íþróttaakademíunni kl. 16.
Á laugardag kemur Kvennakór Suðurnesja fram á sýningunni Reykjanes 2009 í Íþróttaakademíunni kl. 13 og í Bíósal Duushúsa kl. 14, en þar mun kórinn flytja lög frá ýmsum löndum.  Á laugardagskvöldinu verður svo flutt á útisviðinu "Ljósanætursvítan", lög eftir tónskáld úr bæjarfélaginu í útsetningu Þóris Baldurssonar.  Fram koma: Einar Júlíusson, Erna Hrönn, Eiríkur Hauksson, Björgvin Halldórsson, Kvennakór Suðurnesja og Karlakór Keflavíkur ásamt hljómsveit, en kórarnir munu meðal annars flytja Ljósalagið 2009, "Ég sá ljósið" eftir Rúnar Júlíusson.  Að því loknu hefst hin margrómaða flugeldasýning Ljósanætur.
Á sunnudaginn verða síðan haldnir hátíðartónleikar í Fjölbrautaskóla Suðurnesja kl. 16, en þar munu kórar af svæðinu, einsöngvarar og hljómsveit flytja lög og atriði úr söngleikjum og óperum, m.a. úr Jesus Christ Superstar, Fiðlaranum á þakinu, My fair lady og La boheme.  Flytjendur eru Valdimar Haukur Hilmarsson baritón, Bragi Jónsson bassi, Rúnar Guðmundsson tenór, Jóhann Smári Sævarsson bassi, Bylgja Dís Gunnarsdóttir sópran, Dagný Jónsdóttir sópran, Jelena Raschke sópran, Elmar Þór Hauksson tenór, Karlakór Keflavíkur, Kvennakór Suðurnesja, kór Keflavíkurkirkju, sönghópurinn Orfeus, hljómsveitin Talenturnar og félagar út Léttsveit Tónlistarskóla Reykjanesbæjar.  Stjórnendur eru Arnór Vilbergsson og Karen J. Sturlaugsson.
Kvennakór Suðurnesja hvetur alla til að kíkja á þessa frábæru viðburði og að sjálfsögðu á allt það sem er í boði á Ljósanótt, en dagskrána í heild sinni má sjá á ljosanott.is.