Þá er aðalfundur og lokahóf að baki og kórinn kominn í sumarfrí.  Á aðalfundi sem haldinn var miðvikudaginn 6. maí urðu þær breytingar á stjórninni að Hildur Harðardóttir sem áður var varaformaður tók við formennsku kórsins og Erla Arnoddsdóttir sem gegnt hefur starfi formanns síðasta árið er nú varaformaður.  Að öðru leyti er aðalstjórn kórsins skipuð þeim Bryndísi Skúladóttur gjaldkera, Elísabetu Guðmundsdóttur ritara og Helgu Jakobsdóttur meðstjórnanda sem allar gáfu kost á sér áfram.  Nýir varamenn í stjórn eru Aðalheiður Gunnarsdóttir og Guðrún Guðmundsdóttir.  Nokkrar nefndir voru skipaðar, í skemmtinefnd eru Guðrún Gunnarsdóttir, Lára María Ingimundardóttir, Helga Hrönn Ólafsdóttir og Birta Rós Arnórsdóttir.  Í kaffinefnd eru Þórdís Símonardóttir og Dagný Hildisdóttir.  Í fjáröflunarnefnd er Aðalheiður Gunnarsdóttir, ekki fengust fleiri til að starfa í þeirri nefnd og er óskað eftir tveimur konum til viðbótar til starfa í fjáröflunarnefnd.  Á fundinum var Þórdís Símonardóttir verðlaunuð fyrir bestu mætingu á æfingar og einnig var Dagnýju Þórunni Jónsdóttur stjórnanda afhent gjöf í þakklætisskyni fyrir frábært starf.  Í lok fundarins var boðið upp á glæsilegar kaffiveitingar sem stjórnarkonur töfruðu fram.

Lokahófið var haldið föstudaginn 8. maí í Kiwanissalnum við Iðavelli og var kórbullum (mökum) boðið með.  Ljúffengur kvöldverður var framreiddur af Erni Garðarssyni og starfsfólki hans hjá Soho veitingum.  Að því loknu steig hin frábæra skemmtinefnd á stokk með skemmtiatriði sem svo sannarlega kitluðu hláturtaugarnar hjá viðstöddum.  Kórinn söng svo hið rússneska "Kalinka" og dönsuðu karlarnir kósakkadans við sönginn.  Keppni var um bestu tilþrifin og hlaut Benóný Guðjónsson (Binni hennar Ínu Dóru) verðlaun fyrir þau.  Það verður að segjast að margir fleiri áttu glæsileg tilþrif en Binni bar af.  Að skemmtiatriðum loknum fór gítarinn á loft og hófst þá fjöldasöngur og eitthvað var dansað líka.  Frábært kvöld og góður endir á vetrinum.

Eins og áður sagði er kórinn kominn í sumarfrí, óvenju snemma að þessu sinni.  Kórinn mun að venju syngja á Ljósanótt og vetrarstarfið hefst svo væntanlega í september.  Við viljum minna á að kórinn tekur að sér að syngja við ýmis tækifæri og geta áhugasamir haft samband við stjórnarkonur en upplýsingar um símanúmer og netföng þeirra er að finna hér á síðunni undir liðnum "Um kórinn".
Kórkonum, stjórnanda og meðleikurum er þakkað frábært starf í vetur.  Hafið það gott í sumar, sjáumst hressar í haust.

Þá er vortónleikum lokið auk fleiri atburða, það virðast allir vera sammála um að vel hafi tekist til og kórinn sé frábær þrátt fyrir "kveneklu".  Það hafðist að læra alla textana, sem var töluverð vinna á öllum þessum tungumálum.  Við erum frábærar, stelpur og svo erum við náttúrulega svo heppnar að hafa frábæran stjórnanda, hana Dagnýju okkar og ekki er hún Geirþrúður píanóleikari síðri.  Kærar þakkir til ykkar fyrir vel unnin störf og einnig til strákanna flottu, Valda og Jóns Árna sem spiluðu með okkur.  Vonandi berast myndir frá tónleikunum inn á síðuna fljótlega.

Næst á dagskrá er aðalfundur en hann verður haldinn í Listasmiðjunni núna á miðvikudaginn 6. maí kl. 20.  Á dagskrá eru venjuleg aðalfundarstörf og að venju verður boðið upp á veitingar.  Það mæta að sjálfsögðu allar á fundinn!

Lokahófið verður síðan á föstudaginn 8. maí í Kiwanissalnum við Iðavelli.  Verð fyrir kórfélaga er kr. 1500 en fyrir "kórbullur" kr. 3000.  Tilkynna þarf um þátttöku á aðalfundinum eða hafa samband við stjórnarkonur í síðasta lagi á miðvikudag ef þið komist ekki á aðalfundinn, símanúmer og netföng hjá þeim eru undir liðnum "Um kórinn" hér á síðunni.

Húsið opnar kl. 19.30.  Borðhald hefst kl. 20.

Matseðill:

Forréttir

• Cesar salat með feta osti, fræjum, sólþurrkuðum tómötum, ferskum parmesan osti og hvítlauks parmesan dressingu.
• Heitreykt bleikja á couscous salati með piparrótarsósu
• Brauð, hummus og rautt pesto

Steikarhlaðborð

• Rósmarín-, hunangs- og sítrónumarineruð kalkúnabringa
• Ofnsteikt kryddjurtamarinerað lambalæri
• Innbökuð nautalund Wellington með sósu Chateau Briande

      Meðlæti

• Sætar kartöflur og kartöflubátar með Miðjarðarhafsgrænmeti, ólífuolíu, hvítlauk og hlynsírópi
• Gratineraðar kartöflur í hvítlauksrjómaostasósu
• Blandað grænmeti
• Tilheyrandi sósur - villisveppasósa og rauðvínssósa

Eftirréttur

• Frönsk súkkulaðiterta með ávöxtum, þeyttum rjóma og Grand Marnier sósu

Maður fær nú bara vatn í munninn, þetta lítur vel út.  Það verður náttúrulega rosa fjör eins og alltaf hjá okkur, það verða heimatilbúin skemmtiatriði og diskó á eftir.  Góða skemmtun!

Æfing fellur niður á morgun, miðvikudaginn 1. apríl.  Næsta æfing verður mánudaginn 6. apríl.  Þetta er ekki aprílgabb.

Því miður hefur Akureyrarferð Kvennakórs Suðurnesja verið aflýst þar sem ekki var nægileg þátttaka í öllum röddum.  Vonandi getum við heimsótt söngsystur okkar á Akureyri síðar. 
Einnig hefur orðið breyting varðandi opnun listasalarins í Listasmiðjunni, en hún verður laugardaginn 25. apríl í tengslum við Frístundahátíð í Reykjanesbæ, en ekki á sumardaginn fyrsta eins og fyrirhugað var.  Áætlað er að kórinn syngi við opnunina ef nógu margar konur geta mætt, einnig er ætlunin að syngja í Ytri-Njarðvíkurkirkju á sumardaginn fyrsta.  Á æfingu í gærkvöldi voru konur beðnar að skrá sig ef þær gætu mætt á þessa viðburði og var þátttakan frekar dræm, vonandi glæðist hún eitthvað.
Vortónleikar kórsins haldast óbreyttir, í Safnaðarheimilinu í Sandgerði 27. apríl kl. 20.00 og í Bíósal Duushúsa í Reykjanesbæ 29. apríl kl. 20.00.
Konur eru hvattar til að mæta vel á æfingar en mæting hefur verið vægast sagt slæm í sumum röddum og erfitt að hafa æfingar ef jafnvel mæta aðeins ein eða tvær konur í einhverjum röddum eins og komið hefur fyrir undanfarið.  Það bitnar þannig á öllum kórnum ef einhverjar mæta illa.  Kórinn hefur átt góðu gengi að fagna síðustu árin og margt skemmtilegt í gangi og því væri leiðinlegt ef starfsemin dytti niður vegna lélegrar mætingar.  Rífum þetta nú upp og höldum frábæra tónleika í vor og höfum gaman af þessu!

Fréttabréf  9. mars 2009

Þá er komið að því sem allir hafa beðið eftir, sem sagt fréttabréfi.  Takk fyrir það sem liðið er af vetri í nýjum húsakynnum.  Þar sem stólarnir eru ekki þeir bestu og ekki hægt að útvega okkur aðra frítt hefur stjórnin ákveðið að kaupa stóla frá bankastofnun í Reykjavík (veit ekki hverri) á kr. 1.500 stk. og koma þeir í hús á miðvikudaginn.

Áætluð er sameiginleg opnun á listasalnum hér í húsinu með þátttöku allra í húsinu 23.apríl og munum við því taka þar nokkur lög, mjög gott að sem flestar sjái sér fært að mæta.  Helst allar.

Tónleikahaldið okkar að vori verður í Safnaðarheimilinu í Sandgerði 27.apríl kl. 20.00 og í Bíósal 29.apríl kl. 20.00.  Síðan verður farið í tónleikaferðalag til Akureyrar 1. maí með rútu frá SBK kl. 10.00 en stjórnin mun bjóða upp á rútuna (ha ha) en allan annan kostnað munu kórkonur borga sjálfar þ.m.t. gistingu og fæði.  Gisting kostar kr. 8.900 pr. mann fyrir 2 nætur og áætlað að matur á laugardagskvöldi kosti ca. 4.000 kr. á mann.  Kórkonur endilega bjóðið kórbullum með. Ef næg þáttaka fæst ekki í röddum verður ekki farið.  Tónleikarnir verða 2. maí í Laugaborg.

Mjög áríðandi er að mæta á allar æfingar og sérstaklega á mánudögum því Geira mun koma og spila undir á mánudögum fram að sumarfríi sem verður eftir tónleikaferðalagið.

Svo eins og venjulega verðum við að vera duglegar að læra texta og mæta á æfingar.  Því við erum bestar.

Kær kveðja stjórnin.

Helgina 7.-8. febrúar síðastliðinn fór Kvennakór Suðurnesja í sínar árlegu æfingabúðir í Skálholti.  Lagt var af stað um tíuleytið á laugardagsmorgni í fallegu vetrarveðri, jörð var hvít og himininn heiðskír.  Eftir að hafa stoppað stutt í Hveragerði á leiðinni eins og lög gera ráð fyrir var kórinn mættur um hádegisbil í Skálholt.  Þegar konur höfðu komið sér fyrir í herbergjum og fengið sér ljúffengan hádegisverð hófust æfingar sem stóðu fram undir kvöldmat.  Hluta dagsins voru raddæfingar og notuðu konur þá tímann þegar aðrar raddir æfðu ýmist til að fá sér göngutúr í fallegu umhverfinu eða til að slaka á.  Um kvöldið var síðan snæddur gómsætur kvöldverður en eins og ávallt var maturinn mjög góður og vonum við að Bjarni kokkur verði áfram á staðnum eins og undanfarin ár.  Þema kvöldsins var "hálsfestar og höfuðskraut" og voru margar kvennanna fallega skreyttar.  Að kvöldverði loknum var haldin kvöldvaka í setustofu og var að vonum mikið fjör, eins og ætíð þegar hópur skemmtilegra kvenna kemur saman.  Farið var í leiki og að sjálfsögðu voru nýjar konur vígðar inn í hópinn á hefðbundinn hátt.  Gítarinn var á lofti og mikið sungið, þó konur væru búnar að syngja allan daginn.  Vitandi að æfingar héldu áfram næsta morgun voru flestar konur gengnar til náða um og upp úr miðnætti, en þær allra hressustu héldu þó eitthvað lengur áfram.  Að morgni vöknuðu flestar því nokkuð hressar og kátar í morgunverð.  Áður en söngæfingar hófust var byrjað á léttum leikfimis- og teygjuæfingum svona rétt til að koma líkamsstarfseminni aðeins í gang.  Svo var sungið allan daginn með matar- og kaffihléum þar til rútan mætti til að flytja hópinn aftur heim um hálfsexleytið.  Það var þreyttur en ánægður hópur kvenna sem steig út úr rútunni þegar heim var komið.  Helgin var velheppnuð, vel hafði miðað í söngnum auk skemmtunarinnar.  Það er alveg óhætt að mæla með dvöl í Skálholti, aðstaðan er frábær og maturinn ljúffengur og ekki skemmir verðið fyrir.  Kvennakór Suðurnesja hlakkar til að mæta þangað aftur að ári.