Kvennakór Suðurnesja heldur vortónleika í Ytri-Njarðvíkurkirkju mánudaginn 6. maí og í Keflavíkurkirkju miðvikudaginn 8. maí og hefjast tónleikarnir kl. 20:00 bæði kvöldin.

Dagskráin verður létt og skemmtileg en þar má finna ýmsa gamla slagara, bæði íslenska og erlenda auk nokkurra nýrri dægurlaga. Meðal annars heiðra kórkonur minningu Ellýjar Vilhjálms og syngja fjögur af lögum hennar í útsetningu Aðalheiðar Þorsteinsdóttur. Einnig mun kórinn flytja lagið "Breyttur söngur" sem Þóra Marteinsdóttir samdi við ljóð Huldu í tilefni af 10 ára afmæli Gígjunnar, landssambands íslenskra kvennakóra þann 5. apríl sl.  

Í Kvennakór Suðurnesja, sem átti 45 ára afmæli í febrúar, eru konur úr flestum sveitarfélögum á Suðurnesjum. Stjórnandi kórsins er Dagný Þórunn Jónsdóttir og meðleikari á píanó er Geirþrúður Fanney Bogadóttir. Auk hennar leika á tónleikunum þau Harpa Jóhannsdóttir á bassa, Högni Þorsteinsson á gítar og Þorvaldur Halldórsson á trommur.

Miðaverð er 2000 kr. við innganginn en aðeins 1500 kr. í forsölu sem fer fram hjá kórfélögum og á netfanginu kvennakorsudurnesja@gmail.com. 

Þegar sumri lýkur fara farfuglarnir að hefja sig til flugs og það sama má segja um söngfuglana í Kvennakór Suðurnesja. Kórkonur eru reyndar aðeins búnar að hita upp fyrir veturinn með söng á Ljósanótt en kórinn tók þátt í tónlistardagskrá í Duushúsum. Kvennakór Suðurnesja hefur tekið þátt í hátíðinni frá upphafi enda er þetta frábær vettvangur fyrir menningarstarf og skemmtileg leið til að kveðja sumarið og hefja vetrarstarfið. Kvennakórinn tók líka þátt í Sandgerðisdögum en þar sáu kórkonur um kósýkvöld kvenna sem var haldið í sundlauginni í Sandgerði og tókst það frábærlega. Góð mæting var enda flott dagskrá í boði. Bláa lónið var með kynningu á vörum sínum, lesið var úr bókum frá bókaútgáfunni Lesstofunni, glæsilegt happdrætti með flottum vinningum, söngur og tískusýning þar sem kórkonur brugðu sér í hlutverk fyrirsæta og sýndu föt frá hönnuðum af Suðurnesjum.

Vetrarstarfið hefst síðan af fullum krafti mánudaginn 10. september en þá verður haldin opin æfing í Listasmiðjunni, Keilisbraut 773 á Ásbrú en þar er kórinn með æfingaaðstöðu. Kvennakórinn hvetur allar konur sem hafa áhuga á söng til að kíkja við því þó það séu margar skemmtilegar og söngelskar konur í kórnum er nóg pláss fyrir fleiri. Kórkonur ætla líka að slá upp Pálínuboði og verður eflaust ýmislegt girnilegt á borðum. Æfingin hefst kl. 20.

Kvennakór Suðurnesja er elsti starfandi kvennakór á landinu en hann var stofnaður 22. febrúar 1968 og verður því 45 ára í vetur. Dagskrá vetrarins er ekki fullmótuð en gert er ráð fyrir að kórinn komi fram á tónleikum fyrir jólin auk þess sem haldnir verða vortónleikar. Í febrúar fara kórkonur í æfingabúðir í Skálholti. Ýmislegt fleira skemmtilegt er á döfinni sem verður nánar kynnt síðar.

Kórinn æfir á mánudögum kl. 20 og raddæfingar eru á miðvikudögum á sama tíma.

Miðvikudaginn 23. maí  kl. 20:00-22:00 verður aðalfundur Kvennakórs Suðurnesja haldinn í aðstöðu kórsins í Listasmiðjunni að Ásbrú.

Dagskrá aðalfundar:

1.      Skýrsla stjórnar

Ritari les fundargerð síðasta fundar.

Formaður gefur skýrslu um starfsemi á liðnu starfsári.

2.      Reikningar

Gjaldkeri leggur fram endurskoðaða reikninga og skýrir þá.

3.      Umræða um skýrslu og reikninga.

4.      Formenn nefnda skýra frá störfum þeirra:

Ferðanefnd

Skemmtinefnd 

Matarnefnd

Búninganefnd

Kaffinefnd

            5.   Tillögur og lagabreytingar.

6.   Ákvörðun mánaðargjalds.

7.   Kosning stjórnar og varamanna.

8.   Kosning tveggja skoðunarmanna reikninga.

9.   Kosið í nefndir.

Auk þeirra sem að ofan eru taldar verður kosið í fjáröflunarnefnd, húsnefnd og laufabrauðsnefnd.

          10.   Önnur mál.

Lagabreytingar og aðrar tillögur frá kórfélögum skulu berast stjórn eigi síðar en tveimur vikum fyrir aðalfund.

Stefnumótun Kvennakórs Suðurnesja er í höndum kórfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allar konur mæti á aðalfundinn.

Vinsamlegast sendið allar tillögur eða hugmyndir að lagabreytingum á netfangið  inadorah@gmail.com fyrir miðvikudaginn 23. maí 2012.   

Kvennakór Suðurnesja verður á ferð um Snæfellsnes helgina 19. - 20. maí og býður til tónleika í Grundarfjarðarkirkju laugardaginn 19. maí kl. 16.00. 

Einnig mun kórinn taka lagið í Vatnasafninu í Stykkishólmi sunnudaginn 20. maí kl. 13:30.

Kórinn flytur úrval íslenskra og erlendra laga sem senda sumaryl í hjörtun og einsöngvarar úr röðum kórsins koma fram.

Stjórnandi Kvennakórs Suðurnesja er Dagný Þórunn Jónsdóttir og meðleikari á píanó er Geirþrúður Fanney Bogadóttir.

Allir velkomnir og aðgangur er ókeypis.

Kvennakór Suðurnesja fagnar vori með tónleikum í Bíósal Duushúsa mánudaginn 30. apríl og fimmtudaginn 3. maí. Tónleikarnir hefjast kl. 20 báða dagana. Á tónleikunum flytur kórinn úrval íslenskra og erlendra laga sem senda sumaryl í hjörtu þeirra sem á hlýða. Þar á meðal eru tvö lög eftir Hrafnhildi Bryndísi Rafnsdóttur sem er félagi í kvennakórnum. Einnig munu einsöngvarar úr röðum kórsins flytja nokkur lög, en það eru þær Birta Rós Arnórsdóttir, Steinunn Björg Ólafsdóttir og Una María Bergmann.

Helgina 19. - 20. maí ætlar kórinn síðan að halda í ferðalag á Snæfellsnes og munu kórkonur ylja Snæfellingum með söng sínum auk þess að skoða sig um á þessu fallega svæði.

Stjórnandi kórsins er Dagný Þórunn Jónsdóttir og meðleikari á píanó er Geirþrúður Fanney Bogadóttir.

Miðaverð á tónleikana er 2.000 kr. við innganginn en hægt er að kaupa miða í forsölu á 1.500 kr. hjá kórkonum. Einnig er hægt að hringja og panta miða í síma 8974776 og 8987744 eða senda tölvupóst á netfangið kvennakorsudurnesja@gmail.com.

Og þá er loksins komið að því, Skálholt um helgina.  Yndislegar sælustundir sem við höfum átt þar í Kvennakór Suðurnesja. Ég á ekki von á öðru en við höldum uppteknum hætti og njótum okkar, bæði við leik og störf. Allur aðbúnaður er þar til fyrirmyndar. Góður matur, gott andrúmsloft og yndislega fallegur staður. Það er nú svo sem engu logið eins og ein af okkar fyrrverandi formönnum orðaði það svo skemmtilega þegar hún leiddi hópinn í Skálholt: ,,Velkomar í fegurstu sveitir landsins" (Helga Jakobsdóttir). En hún var auðvitað ekkert hlutdræg.

En að ferðinni.